بلا جواز نہیں ہے فلک سے جنگ مری

بلا جواز نہیں ہے فلک سے جنگ مری

اٹک گئی ہے ستارے میں اک پتنگ مری

پھر ایک روز مرے پاس آ کر اس نے کہا

یہ اوڑھنی ذرا قوس قزح سے رنگ مری

جو کائنات کنارے سے جا کے مل جائے

وہی فراغ طلب ہے زمین تنگ مری

میں چیختے ہوئے صحرا میں دور تک بھاگا

نہ جانے ریت کہاں لے گئی امنگ مری

فنا کی سرخ دوپہروں میں رقص جاری تھا

رگیں نچوڑ رہے تھے رباب و چنگ مری

لہو کی بوند گری روشنی کا پھول کھلا

پھر اس کے بعد کوئی اور تھی ترنگ مری

bala jawaz nahin hai falak se jang miri

atak gai hai sitare mein ik patang miri

phir ek roz mire pas a kar us ne kaha

ye orhni zara qaus-e-quzah se rang miri

jo kainat kinare se ja ke mil jae

wahi faragh talab hai zamin-e-tang miri

main chikhte hue sahra mein dur tak bhaga

na jane ret kahan le gai umang miri

fana ki surkh dopaharon mein raqs jari tha

ragen nichor rahe the rabab-o-chang miri

lahu ki bund giri raushni ka phul khula

phir is ke baad koi aur thi tarang miri