ریت مٹھی میں بھری پانی سے آغاز کیا

ریت مٹھی میں بھری پانی سے آغاز کیا

سخت مشکل میں تھا آسانی سے آغاز کیا

مجھ کو مٹی سے بدن بنتے ہوئے عمر لگی

میری تعمیر نے ویرانی سے آغاز کیا

یہ جہانوں کا زمانوں کا مکانوں کا سفر

غیب نے لفظ سے یا معنی سے آغاز کیا

جب بھی یہ آنکھ عناصر کی طرف دیکھتی ہے

یاد آتا ہے پریشانی سے آغاز کیا

جسم اور اسم مجھے کیسے ملے کس نے دیے

ان سوالات کی حیرانی سے آغاز کیا

ایک خاموش سمندر تھا مرے چار طرف

جس میں آواز نے طغیانی سے آغاز کیا

مجھ کو بد صورتیٔ جسم کا اندازہ ہے

میں نے آئینۂ عریانی سے آغاز کیا

ret mutthi mein bhari pani se aghaz kiya

sakht mushkil mein tha asani se aghaz kiya

mujh ko mitti se badan bante hue umr lagi

meri taamir ne wirani se aghaz kiya

ye jahanon ka zamanon ka makanon ka safar

ghaib ne lafz se ya maani se aghaz kiya

jab bhi ye ankh anasir ki taraf dekhti hai

yad ata hai pareshani se aghaz kiya

jism aur ism mujhe kaise mile kis ne diye

un sawalat ki hairani se aghaz kiya

ek khamosh samundar tha mire char taraf

jis mein awaz ne tughyani se aghaz kya

mujh ko bad surati-e-jism ka andaza hai

main ne aina-e-uryani se aghaz kya