تسلسل سے گماں لکھا گیا ہے

تسلسل سے گماں لکھا گیا ہے

یقیں تو ناگہاں لکھا گیا ہے

مکمل ہو چکی قرأت فضا کی

پرندے اور دھواں لکھا گیا ہے

مرا دو پل ٹھہر کر سانس لینا

سر آب رواں لکھا گیا ہے

اگائے گی ستارے اب یہ مٹی

زمیں پر آسماں لکھا گیا ہے

کتاب غیب پڑھتا جا رہا ہوں

مرا ہونا کہاں لکھا گیا ہے

نہیں لکھا گیا کاغذ پہ کچھ بھی

فقط آئندگاں لکھا گیا ہے

tasalsul se guman likha gaya hai

yaqin to nagahan likha gaya hai

mukammal ho chuki qarat faza ki

parinde aur dhuan likha gaya hai

mira do pal thahar kar sans lena

sar-e-ab-e-rawan likha gaya hai

ugaegi sitare ab ye mitti

zamin par asman likha gaya hai

kitab-e-ghaib parhta ja raha hun

mira hona kahan likha gaya hai

nahin likha gaya kaghaz pe kuchh bhi

faqat aindagan likha gaya hai