خواب جزیرہ بن سکتے تھے نہیں بنے

خواب جزیرہ بن سکتے تھے نہیں بنے

ہم بھی قصہ بن سکتے تھے نہیں بنے

کرنیں برف زمینوں تک پہنچانے کو

بادل شیشہ بن سکتے تھے نہیں بنے

قطرہ قطرہ بہتے رہے بے مایہ رہے

آنسو دریا بن سکتے تھے نہیں بنے

اپنا گھر بھی ڈھونڈ نہ پاتے کھو جاتے

جگنو اندھیرا بن سکتے تھے نہیں بنے

ہم دو چار محبت لکھنے والے لوگ

دنیا جیسا بن سکتے تھے نہیں بنے

خواب تلاوت ہو سکتا تھا نہیں ہوا

درد صحیفہ بن سکتے تھے نہیں بنے

اس برہا کے چاند کی صورت ہم بھی طریرؔ

رات کو کتبہ بن سکتے تھے نہیں بنے

khwab jazira ban sakte the nahin bane

ham bhi qissa ban sakte the nahin bane

kirnen barf zaminon tak pahunchane ko

badal shisha ban sakte the nahin bane

qatra qatra bahte rahe be maya rahe

ansu dariya ban sakte the nahin bane

apna ghar bhi dhund na pate kho jate

jugnu andhera ban sakte the nahin bane

ham do char mohabbat likhne wale log

duniya jaisa ban sakte the nahin bane

khwab tilawat ho sakta tha nahin hua

dard sahifa ban sakte the nahin bane

is barha ke chand ki surat ham bhi tarir

rat ko katba ban sakte the nahin bane