گماں اندر گماں کی کیفیت ہے

گماں اندر گماں کی کیفیت ہے

زمیں پر آسماں کی کیفیت ہے

بدن پر برف کو محسوس کرنا

کوئی آب رواں کی کیفیت ہے

یہ کیسا تجربہ ہے سوچتا ہوں

مکاں میں لا مکاں کی کیفیت ہے

کوئی آواز ابھری ہے بدن میں

سکوت جاوداں کی کیفیت ہے

نہیں ہوں میں نہیں ہوں بولتا ہوں

نہیں میں یعنی ہاں کی کیفیت ہے

ترے لب جھیل پر ابھرے ہوئے ہیں

عجب زخم نہاں کی کیفیت ہے

طریرؔ اک بار جینا چاہتا ہوں

جو سب آئندگاں کی کیفیت ہے

guman andar guman ki kaifiyat hai

zamin par asman ki kaifiyat hai

badan par barf ko mahsus karna

koi ab-e-rawan ki kaifiyat hai

ye kaisa tajriba hai sochta hun

makan mein la makan ki kaifiyat hai

koi awaz ubhri hai badan mein

sukut-e-jawedan ki kaifiyat hai

nahin hun main nahin hun bolta hun

nahin main yaani han ki kaifiyat hai

tire lab jhil par ubhre hue hain

ajab zakhm-e-nihan ki kaifiyat hai

tarir ik bar jina chahta hun

jo sab aindagan ki kaifiyat hai