بدن پر ٹانک کر تارے اڑایا جا رہا ہے

بدن پر ٹانک کر تارے اڑایا جا رہا ہے

مجھے آخر پرندہ کیوں بنایا جا رہا ہے

جہاں پر ختم ہوتی ہے سمے کی راجدھانی

بدن ٹھہرا ہوا ہے اور سایا جا رہا ہے

میں سویا بھی نہیں ہوں اور سپنا دیکھتا ہوں

زمیں کو آسمانوں پر بچھایا جا رہا ہے

نظر آتی نہیں ہے بولنے والے کی صورت

سنائی دے رہا ہے جو سنایا جا رہا ہے

اچانک اس صدا سے کانپ اٹھتی ہیں زمینیں

سنبھل جاؤ پہاڑوں کو ہلایا جا رہا ہے

مجھے مٹی کا چہرہ اور آنکھیں دے کے بھیجا

کہا یہ صبر تیرا آزمایا جا رہا ہے

کہانی ختم ہونے کی نشانی ہے یہ لمحہ

دعا کو زرد پتوں میں چھپایا جا رہا ہے

badan par tank kar tare uraya ja raha hai

mujhe akhir parinda kyun banaya ja raha hai

jahan par khatm hoti hai samay ki rajdhani

badan thahra hua hai aur saya ja raha hai

main soya bhi nahin hun aur sapna dekhta hun

zamin ko asmanon par bichhaya ja raha hai

nazar ati nahin hai bolne wale ki surat

sunai de raha hai jo sunaya ja raha hai

achanak is sada se kanp uthti hain zaminen

sambhal jao paharon ko hilaya ja raha hai

mujhe mitti ka chehra aur ankhen de ke bheja

kaha ye sabr tera azmaya ja raha hai

kahani khatm hone ki nishani hai ye lamha

dua ko zard patton mein chhupaya ja raha hai