Arooz is now on the App Store, for iPhone and iPad. Download →

All poetry

بقا کے ساتھ انا کا سوال آتا ہے

Badr-e-Alam Khan Azmi

بقا کے ساتھ انا کا سوال آتا ہے

کسی عروج پہ جب بھی زوال آتا ہے

جو ٹوٹتا ہے کبھی شاخ سے کوئی پتا

کسی کے عہد وفا کا خیال آتا ہے

سپہ گری تو بزرگوں کے ساتھ دفن ہوئی

ہمیں تو آج فن قیل و قال آتا ہے

جو منہ چڑھاتے ہیں آثار عہد ماضی کے

ہمارے خون میں اکثر ابال آتا ہے

نہ جانے کیوں وہی اولاد سے پریشاں ہیں

گھروں میں جن کے حرام و حلال آتا ہے

مرے خیال میں آ کر چٹخ گیا وہ بدن

سنا تھا میں نے کہ شیشے میں بال آتا ہے

اسے پتہ ہے کہ دریا کا ظرف کتنا ہے

وہ ساری نیکیاں ساحل پہ ڈال آتا ہے