اب کوئی بات ملاقات پہ مت چھوڑیئے گا

اب کوئی بات ملاقات پہ مت چھوڑیئے گا

حال کہہ دیجے گا حالات پہ مت چھوڑیئے گا

گاتے رہیے گا کڑی دھوپ میں بھی نغمۂ عشق

اب جنوں موسم برسات پہ مت چھوڑیئے گا

چشم حیرت میں نمی رکھیے گا وجدان کی بھی

راز سارے ہی کرامات پہ مت چھوڑیئے گا

شہر میں رکھیے گا کچھ پیڑ لگانے کی جگہ

یہ فریضہ بھی مضافات پہ مت چھوڑیئے گا

یار جب دھیان میں آ جائے وہیں کیجئے رقص

جشن اب صورت حالات پہ مت چھوڑیئے گا

بے سبب ٹوٹ بھی جاتی ہے کبھی بات کہیں

دوست اچھا ہو تو اس بات پہ مت چھوڑیئے گا

جو بھی ہونا ہے وہ ہو کر ہی رہے گا حیدرؔ

یعنی دل وہم و خیالات پہ مت چھوڑیئے گا

ab koi bat mulaqat pe mat chhoriyega

hal kah dije ga halat pe mat chhoriyega

gate rahiyega kari dhup mein bhi naghma-e-ishq

ab junun mausam-e-barsat pe mat chhoriyega

chashm-e-hairat mein nami rakhiyega wijdan ki bhi

raz sare hi karamat pe mat chhoriyega

shahr mein rakhiyega kuchh per lagane ki jagah

ye fariza bhi muzafat pe mat chhoriyega

yar jab dhyan mein a jae wahin kijiye raqs

jashn ab surat-e-halat pe mat chhoriyega

be sabab tut bhi jati hai kabhi bat kahin

dost achchha ho to is bat pe mat chhoriyega

jo bhi hona hai wo ho kar hi rahega haidar

yaani dil wahm-o-khayalat pe mat chhoriyega