نشیب ہجر میں دن اختتام کرتے ہوئے

نشیب ہجر میں دن اختتام کرتے ہوئے

میں خود میں ڈوبتا جاتا تھا شام کرتے ہوئے

ہر ایک لہر ہے اپنے اسی بہاؤ میں

میں تھک گیا ترے دریا کو رام کرتے ہوئے

برس پڑا جو کسی روز مجھ پہ عکس مرا

درون‌‌ آئنہ خانہ قیام کرتے ہوئے

مرے سکوت کو دہرانے والے یہ در و بام

سنائی دینے لگے ہیں کلام کرتے ہوئے

تمام عمر تری رہ گزر پہ بیٹھ رہا

مرا غبار ترا احترام کرتے ہوئے

یہ خامشی ہے تو رکئے بغور سنتے ہوئے

سخنوری ہے تو چلئے تمام کرتے ہوئے

گریز پائی کی حد سے گزر گیا تھا وہ شخص

نعیمؔ دور سے مجھ کو سلام کرتے ہوئے

nasheb hijr mein din ikhtitam karte hue

main khud mein dubta jata tha sham karte hue

har ek lahr hai apne isi bahao mein

main thak gaya tire dariya ko ram karte hue

baras para jo kisi roz mujh pe aks mira

darun-e-aina khana qayam karte hue

mire sukut ko dohrane wale ye dar-o-bam

sunai dene lage hain kalam karte hue

tamam umr tiri rah guzar pe baith raha

mira ghubar tira ehtiram karte hue

ye khamushi hai to rukiye baghaur sunte hue

sukhanwari hai to chaliye tamam karte hue

gurez pai ki had se guzar gaya tha wo shakhs

naim dur se mujh ko salam karte hue