ہرے ہیں زخم کچھ اس طرح بھی مرے سر کے

ہرے ہیں زخم کچھ اس طرح بھی مرے سر کے

تمام عمر اٹھائے ہیں ناز پتھر کے

لہولہان ہوا ہے مرا بدن یوں بھی

پکڑ نہ پایا کبھی ہاتھ میں ستم گر کے

بس ایک حرف مقرر کے جرم میں ہم نے

زباں پہ وار ہزاروں سہے ہیں خنجر کے

وہ لوگ لایا گیا ہے جنہیں برابر میں

کسی طرح بھی نہیں تھے مرے برابر کے

کچھ ایسے زخم بھی سر کو جھکا کے کھائے ہیں

جو میرے بخت کے تھے اور نہ تھے مقدر کے

یہی اتاریں گے منزل پہ ایک دن مجھ کو

یہ جتنے زخم ہیں پاؤں میں میرے ٹھوکر کے

نبیلؔ آج وہ سر پہ سوار ہیں میرے

جو لوگ گھر میں بسائے تھے میں نے باہر کے

hare hain zakhm kuchh is tarah bhi mire sar ke

tamam umr uthae hain naz patthar ke

lahuluhan hua hai mira badan yun bhi

pakar na paya kabhi hath mein sitam gir ke

bas ek harf muqarrar ke jurm mein ham ne

zaban pe war hazaron sahe hain khanjar ke

wo log laya gaya hai jinhen barabar mein

kisi tarah bhi nahin the mire barabar ke

kuchh aise zakhm bhi sar ko jhuka ke khae hain

jo mere bakht ke the aur na the muqaddar ke

yahi utarenge manzil pe ek din mujh ko

ye jitne zakhm hain paon mein mere thokar ke

nabil aj wo sar pe sawar hain mere

jo log ghar mein basae the main ne bahar ke