دل دھڑکنوں میں جیسے دھڑکتا اسی کا تھا

دل دھڑکنوں میں جیسے دھڑکتا اسی کا تھا

جیسے مرے وجود پہ چہرہ اسی کا تھا

رکھا ہوا تھا جس کو زمانے سے دور دور

ہر لب پہ اس کا تذکرہ چرچا اسی کا تھا

آنے دیا نہ چین کبھی ایک پل مجھے

میرے تصورات میں دھڑکا اسی کا تھا

جس نے تمام شہر کھنڈر میں بدل دیا

سکہ تمام شہر میں چلتا اسی کا تھا

یوں تو ہزار زخم مجھے اور بھی لگے

لیکن جو زخم سب سے تھا گہرا اسی کا تھا

شدت کی پیاس نے مجھے گھیرا تو یہ کھلا

صحرا کا جو مکین تھا دریا اسی کا تھا

ہم کو ہے آج تک اسی تعبیر کی طلب

آیا تھا کل نبیلؔ جو سپنا اسی کا تھا

روشن تھا جس چراغ کی لو سے بدن نبیلؔ

مجھ کو تمام عمر ہی دھڑکا اسی کا تھا

dil dharkanon mein jaise dharakta usi ka tha

jaise mire wajud pe chehra usi ka tha

rakha hua tha jis ko zamane se dur dur

har lab pe us ka tazkira charcha usi ka tha

ane diya na chain kabhi ek pal mujhe

mere tasawwurat mein dharka usi ka tha

jis ne tamam shahr khandar mein badal diya

sikka tamam shahr mein chalta usi ka tha

yun to hazar zakhm mujhe aur bhi lage

lekin jo zakhm sab se tha gahra usi ka tha

shiddat ki pyas ne mujhe ghera to ye khula

sahra ka jo makin tha dariya usi ka tha

ham ko hai aj tak isi taabir ki talab

aya tha kal nabil jo sapna usi ka tha

raushan tha jis charagh ki lau se badan nabil

mujh ko tamam umr hi dharka usi ka tha