تنکے کا ہاتھ آیا سہارا غلط غلط

تنکے کا ہاتھ آیا سہارا غلط غلط

موج طلب نے پایا کنارا غلط غلط

سیل بلا میں ڈوب رہا تھا میں جس گھڑی

دنیا کے ساتھ اس نے پکارا غلط غلط

ہم لوگ جی رہے ہیں ترے شہر میں ابھی

کیجے نہ اندراج ہمارا غلط غلط

چلتا ہے دشمنوں کی طرح میرے ساتھ جو

اس نے کیا ہے مجھ کو گوارا غلط غلط

کوئی بھی چیز رہنی نہیں تا ابد یہاں

نقشہ ہے اس جہان کا سارا غلط غلط

شاخ طلب کو پانی دیا ہے لہو نہیں

ہم نے ہر ایک گل کو نکھارا غلط غلط

راتوں کا اضطراب نہیں یوں بھی جا سکا

ابھرا ہے ظلمتوں میں ستارہ غلط غلط

اک اک ورق میں خوف کا مضمون ہے میاں

ہے زیست کا ہر ایک شمارہ غلط غلط

دھوکا دیا ہے آئنے کو اس نے اس طرح

زلفوں کو اس نے رخ پہ سنوارا غلط غلط

الزام دے کے دانۂ گندم کا اے نبیلؔ

اس نے مجھے زمیں پہ اتارا غلط غلط

tinke ka hath aya sahara ghalat ghalat

mauj-e-talab ne paya kinara ghalat ghalat

sail-e-bala mein dub raha tha main jis ghari

duniya ke sath us ne pukara ghalat ghalat

ham log ji rahe hain tire shahr mein abhi

kije na indiraj hamara ghalat ghalat

chalta hai dushmanon ki tarah mere sath jo

us ne kiya hai mujh ko gawara ghalat ghalat

koi bhi chiz rahni nahin ta abad yahan

naqsha hai is jahan ka sara ghalat ghalat

shakh-e-talab ko pani diya hai lahu nahin

ham ne har ek gul ko nikhara ghalat ghalat

raton ka iztirab nahin yun bhi ja saka

ubhra hai zulmaton mein sitara ghalat ghalat

ik ik waraq mein khauf ka mazmun hai miyan

hai zist ka har ek shumara ghalat ghalat

dhoka diya hai aine ko us ne is tarah

zulfon ko us ne rukh pe sanwara ghalat ghalat

ilzam de ke dana-e-gandum ka ai nabil

us ne mujhe zamin pe utara ghalat ghalat