آنکھوں کے اضطراب سے ایسے جھڑے ہیں خواب

آنکھوں کے اضطراب سے ایسے جھڑے ہیں خواب

شب کے شجر پہ نیند کی صورت پڑے ہیں خواب

آتی نہیں ہے نیند مجھے اس لیے بھی دوست

آنکھوں کی پتلیوں میں ہزاروں جھڑے ہیں خواب

نکلا نہ پھر بھی کوئی نتیجہ بہار کا

تعبیر سے اگرچہ بہت ہی لڑے ہیں خواب

جب بھی چلا ہوں نیند کے رستے پہ یوں لگا

ہاتھوں کو جوڑ کر مرے آگے کھڑے ہیں خواب

دل سے غموں کا اس لیے چھالا نہ جا سکا

کانٹوں کی مثل چشم طلب میں اڑے ہیں خواب

تجھ کو کہاں خبر ہے کہ کیسے ہیں رت جگے

تجھ کو کہاں خبر ہے کہ کتنے کڑے ہیں خواب

اس بار بھی یہاں خس و خاشاک کی طرح

آنکھوں میں جس قدر تھے وہ سارے سڑے ہیں خواب

آیا نہیں نبیلؔ پلٹ کے وہ ایک شخص

رنجیدہ اس لیے بھی ہمارے بڑے ہیں خواب

ankhon ke iztirab se aise jhare hain khwab

shab ke shajar pe nind ki surat pare hain khwab

ati nahin hai nind mujhe is liye bhi dost

ankhon ki putliyon mein hazaron jhare hain khwab

nikla na phir bhi koi natija bahar ka

taabir se agarche bahut hi lare hain khwab

jab bhi chala hun nind ke raste pe yun laga

hathon ko jor kar mire age khare hain khwab

dil se ghamon ka is liye chhala na ja saka

kanton ki misl-e-chashm-e-talab mein ure hain khwab

tujh ko kahan khabar hai ke kaise hain rut jage

tujh ko kahan khabar hai ke kitne kare hain khwab

is bar bhi yahan khas-o-khashak ki tarah

ankhon mein jis qadar the wo sare sare hain khwab

aya nahin nabil palat ke wo ek shakhs

ranjida is liye bhi hamare bare hain khwab