طے ہوا ہے اس طرف کی رہ گزر کا جاگنا

طے ہوا ہے اس طرف کی رہ گزر کا جاگنا

میرے پاؤں میں کسی لمبے سفر کا جاگنا

بولتے تھے کیا پرندے سے در و دیوار پر

یاد ہے اب بھی مجھے وہ اپنے گھر کا جاگنا

اب کہاں موسم ہے وہ دار و رسن کا دوستو

اب کہاں عشاق کے شانوں پہ سر کا جاگنا

ورنہ مجھ کو دھوپ کا صحرا کبھی نہ چھوڑتا

آ گیا ہے کام میرے اک شجر کا جاگنا

اک پرانی آرزو ٹھہری اجالوں کی طلب

اک پرانا خواب ٹھہرا ہے سحر کا جاگنا

آسماں کھلتے گئے مجھ پر زمینوں کی طرح

ایک لمحے کے لیے تھا بال و پر کا جاگنا

میں نبیلؔ اس خوف سے اک عمر سویا ہی نہیں

زندگی بھر کا ہے سونا لمحہ بھر کا جاگنا

tai hua hai is taraf ki rah guzar ka jagna

mere paon mein kisi lambe safar ka jagna

bolte the kya parinde se dar-o-diwar par

yad hai ab bhi mujhe wo apne ghar ka jagna

ab kahan mausam hai wo dar-o-rasan ka dosto

ab kahan ushshaq ke shanon pe sar ka jagna

warna mujh ko dhup ka sahra kabhi na chhorta

a gaya hai kam mere ik shajar ka jagna

ik purani arzu thahri ujalon ki talab

ik purana khwab thahra hai sahar ka jagna

asman khulte gae mujh par zaminon ki tarah

ek lamhe ke liye tha bal-o-par ka jagna

main nabil is khauf se ik umr soya hi nahin

zindagi bhar ka hai sona lamha bhar ka jagna