یہ حادثہ بھی سر رہ گزار ہونا تھا

یہ حادثہ بھی سر رہ گزار ہونا تھا

تری تلاش میں مجھ کو غبار ہونا تھا

اچک لیا ہے انہیں بھی خزاں کے موسم نے

وہ پھول پات کہ جن کو بہار ہونا تھا

ہمیں خبر تھی تری طرز بادشاہی سے

ہنر وروں کو ہی بے اختیار ہونا تھا

انہی کے ہاتھ گریبان میں پڑے ہوئے ہیں

جنہیں سدا سے ہی خدمت گزار ہونا تھا

گماں کی دھول مرے دل پہ مل گیا ہے وہی

وہ شخص جس کو مرا اعتبار ہونا تھا

بھروسہ غیر کی چھاؤں پہ ہم نہ کرتے اگر

سروں پہ سایۂ پروردگار ہونا تھا

بدل دیا انہیں مٹی کے برتنوں میں نبیلؔ

وہ چیزیں جن کو بہت پائیدار ہونا تھا

ye hadisa bhi sar-e-rah guzar hona tha

tiri talash mein mujh ko ghubar hona tha

uchak liya hai unhen bhi khizan ke mausam ne

wo phul pat ke jin ko bahar hona tha

hamen khabar thi tiri tarz-e-badshahi se

hunar waron ko hi be ikhtiyar hona tha

unhi ke hath gareban mein pare hue hain

jinhen sada se hi khidmat guzar hona tha

guman ki dhul mire dil pe mil gaya hai wahi

wo shakhs jis ko mira etibar hona tha

bharosa ghair ki chhaon pe ham na karte agar

saron pe saya-e-parwardigar hona tha

badal diya unhen mitti ke bartanon mein nabil

wo chizen jin ko bahut paidar hona tha