جب سے امید باندھی پتھر پر

جب سے امید باندھی پتھر پر

دھول سی جم گئی مقدر پر

کس نے چادر دھویں کی تانی ہے

میرے جنت مثال منظر پر

میرے چارہ گروں نے رکھا ہے

ایک اک راستے کو ٹھوکر پر

آسماں کی طلب میں کٹ کر بھی

پھڑپھڑاتے رہے برابر پر

پاس تیر و کماں کے ہوتے ہوئے

خوف طاری ہے میرے لشکر پر

جب گھڑی امتحان کی آئی

میں نے رکھ دی زباں اخگر پر

قید کمرے میں ہو گیا ہوں نبیلؔ

پھینک کر میں گلی سے باہر پر

jab se ummid bandhi patthar par

dhul si jam gai muqaddar par

kis ne chadar dhuen ki tani hai

mere jannat misal manzar par

mere chara garon ne rakha hai

ek ik raste ko thokar par

asman ki talab mein kat kar bhi

pharpharate rahe barabar par

pas tir-o-kaman ke hote hue

khauf tari hai mere lashkar par

jab ghari imtihan ki ai

main ne rakh di zaban akhgar par

qaid kamre mein ho gaya hun nabil

phenk kar main gali se bahar par