کرن کرن یہ کسی دیدۂ حسد میں ہے

کرن کرن یہ کسی دیدۂ حسد میں ہے

ہر اک چراغ ہمارا دھویں کی زد میں ہے

جسے نکالا ہے ہندسوں سے زائچہ گر نے

بقا ہماری اسی پانچ کے عدد میں ہے

ہر ایک شخص کی قامت کو ناپ اور بتا

مرے علاوہ یہاں کون اپنے قد میں ہے

گھروں کے صحن کچھ ایسے سکڑ سمٹ گئے ہیں

ہر ایک شخص مکیں جس طرح لحد میں ہے

لگے ہیں شاخوں پہ جس دن سے پھول پات نئے

ہر ایک پیڑ حویلی کا چشم بد میں ہے

نبیلؔ ایسے ادھورے ہیں روز و شب جیسے

مرا ازل کسی اندیشۂ ابد میں ہے

kiran kiran ye kisi dida-e-hasad mein hai

har ik charagh hamara dhuen ki zad mein hai

jise nikala hai hindson se zaicha gar ne

baqa hamari isi panch ke adad mein hai

har ek shakhs ki qamat ko nap aur bata

mire alawa yahan kaun apne qad mein hai

gharon ke sehn kuchh aise sakar simat gae hain

har ek shakhs makin jis tarah lahad mein hai

lage hain shakhon pe jis din se phul pat nae

har ek per haweli ka chashm-e-bad mein hai

nabil aise adhure hain roz-o-shab jaise

mira azal kisi andesha-e-abad mein hai