وہ ہیں تیار عمارت کو گرانے والے

وہ ہیں تیار عمارت کو گرانے والے

تو کہاں ہے مری بنیاد اٹھانے والے

سوچتا ہوں سر ساحل کھڑا جانے کب سے

ڈوب جاتے ہیں کہاں پار لگانے والے

ان سے کہہ دو نہ کریں دست ہوس ہم پہ دراز

ہم تو پینے سے زیادہ ہیں پلانے والے

غم کی تعبیر سے پہلے مجھے معلوم نہ تھا

میرے اشعار کو سنگیت بنانے والے

بادباں تیز ہواؤں سے پھٹے جاتے ہیں

ڈوب جائیں نہ کہیں پار لگانے والے

رات ہوتی ہے تو جلتے ہیں مری آنکھوں میں

یہ ستارے جو ہیں سورج کے گھرانے والے

کچھ تو ہے جس سے ہے باقی تری دنیا کا جواز

کم ہی دیکھے ہیں تعلق کو نبھانے والے

یوں ہی معیار بدلتے رہے دنیا کے اگر

پھر کہاں آئیں گے ملنے وہی آنے والے

بانٹتے پھرتے ہیں ہر سمت اندھیروں کو نبیلؔ

سلسلہ اپنے چراغوں کا بڑھانے والے

wo hain tayyar imarat ko girane wale

tu kahan hai miri buniyad uthane wale

sochta hun sar-e-sahil khara jane kab se

dub jate hain kahan par lagane wale

un se kah do na karen dast-e-hawas ham pe daraz

ham to pine se ziyada hain pilane wale

gham ki taabir se pahle mujhe maalum na tha

mere ashar ko sangit banane wale

badban tez hawaon se phate jate hain

dub jaen na kahin par lagane wale

rat hoti hai to jalte hain miri ankhon mein

ye sitare jo hain suraj ke gharane wale

kuchh to hai jis se hai baqi tiri duniya ka jawaz

kam hi dekhe hain taalluq ko nibhane wale

yun hi meyar badalte rahe duniya ke agar

phir kahan aenge milne wahi ane wale

bantte phirte hain har samt andheron ko nabil

silsila apne charaghon ka barhane wale