زندگی تیری تمنا میں بسر ہو جائے

زندگی تیری تمنا میں بسر ہو جائے

اور کیا چاہئے جو بار دگر ہو جائے

درد کی دھوپ ڈھلے آس کا موسم نکھرے

تیرے امکان کا پودا جو شجر ہو جائے

اپنی سچائی کا پھر مجھ کو یقیں آئے گا

زینت دار و رسن میرا جو سر ہو جائے

زندگی کرنے کا آ جائے سلیقہ جو ہمیں

صورت خلد بریں اپنا یہ گھر ہو جائے

مجھ کو بس اتنا ہی سامان سفر کافی ہے

میری منزل ہی مرا رخت سفر ہو جائے

کھل اٹھے پھول کی مانند مقدر میرا

میرے محبوب اگر تیری نظر ہو جائے

حاصل زیست وہی میری تمنا ہے وہی

وہ کسی روز مقدر کا ثمر ہو جائے

غم دنیا سے ملے مجھ کو رہائی اے نبیلؔ

میری آہوں کا اگر اس پہ اثر ہو جائے

کوئی دامن نہ اڑے زرد ہواؤں سے نبیلؔ

گر سہارا جو بشر کا یہ بشر ہو جائے

zindagi teri tamanna mein basar ho jae

aur kiya chahiye jo bar-e-digar ho jae

dard ki dhup dhale as ka mausam nikhre

tere imkan ka pauda jo shajar ho jae

apni sachchai ka phir mujh ko yaqin aega

zinat-e-dar-o-rasan mera jo sar ho jae

zindagi karne ka a jae saliqa jo hamen

surat-e-khuld-e-barin apna ye ghar ho jae

mujh ko bas itna hi saman-e-safar kafi hai

meri manzil hi mira rakht-e-safar ho jae

khul uthe phul ki manind muqaddar mera

mere mahbub agar teri nazar ho jae

hasil-e-zist wahi meri tamanna hai wahi

wo kisi roz muqaddar ka samar ho jae

gham-e-duniya se mile mujh ko rihai ai nabil

meri ahon ka agar us pe asar ho jae

koi daman na ure zard hawaon se nabil

gar sahara jo bashar ka ye bashar ho jae