ہر بدن کو اب یہاں ایسا گہن لگنے لگا

ہر بدن کو اب یہاں ایسا گہن لگنے لگا

جس کو دیکھو اب وہی بے پیرہن لگنے لگا

جب سے ڈھالا ہے ستاروں میں نگاہ شوق کو

چاند سے بڑھ کر تمہارا بانکپن لگنے لگا

میری جانب پیار سے دیکھے نہ کوئی اک نظر

حلقۂ احباب تیری انجمن لگنے لگا

زندہ لاشوں کی طرح لگنے لگی انسانیت

پیرہن اب آدمیت کا کفن لگنے لگا

میں نے رکھا ہے ہمیشہ اپنی دھرتی کا بھرم

اس لیے بھی مجھ سے وہ چرخ کہن لگنے لگا

میں نے رکھا تھا جہاں پر پھول تیرے نام کا

اس زمیں کا اتنا حصہ اب چمن لگنے لگا

جب سے سچائی کے رستے کو کیا ہے منتخب

نوک خنجر سے چھدا اپنا بدن لگنے لگا

رفتہ رفتہ نوک خامہ پر ہوس چھانے لگی

دھیرے دھیرے رائیگاں کار سخن لگنے لگا

یہ جو باندھا ہے گریباں سے جنوں کے ہاتھ کو

اہل دانش کو مگر دیوانہ پن لگنے لگا

جس گلستاں پر لہو چھڑکا تھا ہم نے اے نبیلؔ

ڈالی ڈالی آج وہ اک دشت و بن لگنے لگا

har badan ko ab yahan aisa gahan lagne laga

jis ko dekho ab wahi be pairahan lagne laga

jab se dhala hai sitaron mein nigah-e-shauq ko

chand se barh kar tumhara bankpan lagne laga

meri janib pyar se dekhe na koi ik nazar

halqa-e-ahbab teri anjuman lagne laga

zinda lashon ki tarah lagne lagi insaniyat

pairahan ab admiyyat ka kafan lagne laga

main ne rakha hai hamesha apni dharti ka bharam

is liye bhi mujh se wo charkh-e-kuhan lagne laga

main ne rakha tha jahan par phul tere nam ka

is zamin ka itna hissa ab chaman lagne laga

jab se sachchai ke raste ko kya hai muntakhab

nok-e-khanjar se chhida apna badan lagne laga

rafta rafta nok-e-khama par hawas chhane lagi

dhire dhire raigan kar sukhan lagne laga

ye jo bandha hai gareban se junun ke hath ko

ahl-e-danish ko magar diwana pan lagne laga

jis gulistan par lahu chhirka tha ham ne ai nabil

dali dali aj wo ik dasht-o-ban lagne laga