سر جھکا کر شاہ کے دربار میں

سر جھکا کر شاہ کے دربار میں

چھید ہم نے سو کیے دستار میں

زندگانی جیسی یہ انمول شے

کاٹ دی ہے حسرت بے کار میں

دامنوں میں بھرتے ہیں محرومیاں

لے کے خالی جیب ہم بازار میں

سرخیاں بن کر اگلتی ہے لہو

آدمیت شام کے اخبار میں

سر کو ٹکراتے رہے ہم عمر بھر

در کوئی نکلا نہیں دیوار میں

جس قدر بھرتا رہا اونچی اڑان

آدمی گرتا گیا معیار میں

سب پرندے کر گئے ہجرت نبیلؔ

کون بیٹھے سایۂ اشجار میں

sar jhuka kar shah ke darbar mein

chhed ham ne so kiye dastar mein

zindagani jaisi ye anmol shai

kat di hai hasrat-e-be kar mein

damanon mein bharte hain mahrumiyan

le ke khali jeb ham bazar mein

surkhiyan ban kar ugalti hai lahu

admiyyat sham ke akhbar mein

sar ko takrate rahe ham umr bhar

dar koi nikla nahin diwar mein

jis qadar bharta raha unchi uran

admi girta gaya meyar mein

sab parinde kar gae hijrat nabil

kaun baithe saya-e-ashjar mein