مری دیوانگی کو اپنی زلفوں میں چھپا بیٹھے

مری دیوانگی کو اپنی زلفوں میں چھپا بیٹھے

تماشا دیکھنے والے تماشا کیوں دکھا بیٹھے

بجز ان چار اشکوں کے ہمارے پاس تھا ہی کیا

اسی دولت کے مالک تھے اسی کو ہم لٹا بیٹھے

مری جانب سے پہلے ہی بھرے بیٹھے تھے غصے میں

تمہارے ہاتھ کیا آیا لگی میں کیوں لگا بیٹھے

اب اس کا جیسا جی چاہے بھلا مانے برا مانے

ہوئے مجبور اس دل سے تو ہم بھی در پہ آ بیٹھے

کوئی واقف نہ تھا اعجازؔ اس دل کے تعلق سے

حقیقت کھل گئی آخر جو وہ پردے میں جا بیٹھے

عجب عالم تھا اے اعجازؔ رندوں کی مسرت کا

مرے ہاتھوں میں جام آیا تو مے خانہ لٹا بیٹھے