مری دیوانگی کو اپنی زلفوں میں چھپا بیٹھے

مری دیوانگی کو اپنی زلفوں میں چھپا بیٹھے

تماشا دیکھنے والے تماشا کیوں دکھا بیٹھے

بجز ان چار اشکوں کے ہمارے پاس تھا ہی کیا

اسی دولت کے مالک تھے اسی کو ہم لٹا بیٹھے

مری جانب سے پہلے ہی بھرے بیٹھے تھے غصے میں

تمہارے ہاتھ کیا آیا لگی میں کیوں لگا بیٹھے

اب اس کا جیسا جی چاہے بھلا مانے برا مانے

ہوئے مجبور اس دل سے تو ہم بھی در پہ آ بیٹھے

کوئی واقف نہ تھا اعجازؔ اس دل کے تعلق سے

حقیقت کھل گئی آخر جو وہ پردے میں جا بیٹھے

عجب عالم تھا اے اعجازؔ رندوں کی مسرت کا

مرے ہاتھوں میں جام آیا تو مے خانہ لٹا بیٹھے

miri diwangi ko apni zulfon mein chhupa baithe

tamasha dekhne wale tamasha kyun dikha baithe

bajuz un char ashkon ke hamare pas tha hi kya

isi daulat ke malik the usi ko ham luta baithe

miri janib se pahle hi bhare baithe the ghusse mein

tumhare hath kya aya lagi mein kyun laga baithe

ab us ka jaisa ji chahe bhala mane bura mane

hue majbur is dil se to ham bhi dar pe a baithe

koi waqif na tha ejaz is dil ke taalluq se

haqiqat khul gai akhir jo wo parde mein ja baithe

ajab alam tha ai ejaz rindon ki masarrat ka

mire hathon mein jam aya to mai khana luta baithe