سب ان کا حال دیکھ رہے ہیں نظر سے ہم

سب ان کا حال دیکھ رہے ہیں نظر سے ہم

بیٹھے ہیں اس طرح سے کہ ہیں بے خبر سے ہم

ہمت سے کام لے کے نگاہیں ملا تو لیں

الجھن میں پڑ گئے ہیں پیام نظر سے ہم

اڑنے لگا ہے پھیلتا جاتا ہے ہر طرف

اس دامن خیال کو پکڑیں کدھر سے ہم

دکھلا دیا جو آج مقدر نے اس کا در

اک بوجھ تھا اتار چلے اپنے سر سے ہم

دل میں اتر نہ آئیں وہ آنکھوں کی راہ سے

دل کو بچا رہے ہیں خود اپنی نظر سے ہم

راہیں بھی بند ہیں در تقدیر بھی ہے بند

اس کے حریم ناز میں جائیں کدھر سے ہم

ہیں اور کیا ارادے تمہیں اس کی فکر کیوں

اعجازؔ پوچھ لیں گے اسی فتنہ گر سے ہم

sab un ka hal dekh rahe hain nazar se ham

baithe hain is tarah se ke hain be khabar se ham

himmat se kam le ke nigahen mila to len

uljhan mein par gae hain payam-e-nazar se ham

urne laga hai phailta jata hai har taraf

is daman khayal ko pakren kidhar se ham

dikhla diya jo aj muqaddar ne us ka dar

ik bojh tha utar chale apne sar se ham

dil mein utar na aen wo ankhon ki rah se

dil ko bacha rahe hain khud apni nazar se ham

rahen bhi band hain dar-e-taqdir bhi hai band

us ke harim-e-naz mein jaen kidhar se ham

hain aur kiya irade tumhen us ki fikr kyun

ejaz puchh lenge isi fitna gar se ham