Arooz is now on the App Store, for iPhone and iPad. Download →

All poetry

بہ فیض عشق وہ دن بھی کبھی پروردگار آئے

Ejaz Ajmeri

بہ فیض عشق وہ دن بھی کبھی پروردگار آئے

مرے گھر کوئی آ جائے مرے گھر میں بہار آئے

کبھی تو آ ہی جاتا ہے وہ منظر بھی نگاہوں میں

جہاں مرنے کو جی چاہے جہاں جینے میں عار آئے

یہ ویرانی کا عالم ہے یہاں سب خانہ ویراں ہیں

یہ دیوانوں کی دنیا ہے یہاں کوئی ہوشیار آئے

بھرم سب کھل گیا اے شیخ تیری پارسائی کا

سحر مسجد میں پہنچانے تجھے جب بادہ خوار آئے

جنہیں اپنا سمجھتا تھا وہی نکلے ہیں بیگانے

جہاں والوں پہ اب کیا خاک مجھ کو اعتبار آئے

خدا نے حسن کچھ ایسا دیا ہے دیکھ کر جس کو

مرا تو ذکر ہی کیا ہے زمانے بھر کو پیار آئے

یہ کیسا دل بنایا ہے حسینوں کا خدا وندا

نہ ہنسنا سازگار آئے نہ رونا سازگار آئے

نگاہ مہر سے اس نے مجھے اعجازؔ دیکھا ہے

مگر اس چلتے پھرتے سائے کا کیا اعتبار آئے