بے خبر کیسے کوئی راز نہاں تک پہنچے

بے خبر کیسے کوئی راز نہاں تک پہنچے

بات دل سے کہیں نکلے تو زباں تک پہنچے

صاحبان خرد و ہوش بھٹکتے ہی پھرے

اور دیوانوں کا جی چاہا جہاں تک پہنچے

تیرے دیوانوں کی منزل کوئی منزل ہی نہیں

کیا خبر ان کو کہاں آئے کہاں تک پہنچے

ان مظالم کا یہ انجام نئی بات نہیں

سینکڑوں بار قیامت کے نشاں تک پہنچے

راہبر کوئی نہ تھا اور نشانات نہ تھے

دل خضر بن کے چلا ہے تو وہاں تک پہنچے

خاک ہی خاک نظر آیا ہمیں اپنا وجود

بھیس بدلے ہوئے گو بزم جہاں تک پہنچے

تیری اعجاز بیانی کے یہ چرچے اعجازؔ

اب تو ہر بزم میں ہر اہل زباں تک پہنچے

be khabar kaise koi raz-e-nihan tak pahunche

bat dil se kahin nikle to zaban tak pahunche

sahiban-e-khirad-o-hosh bhatakte hi phire

aur diwanon ka ji chaha jahan tak pahunche

tere diwanon ki manzil koi manzil hi nahin

kya khabar un ko kahan ae kahan tak pahunche

un mazalim ka ye anjam nai bat nahin

sainkron bar qayamat ke nishan tak pahunche

rahbar koi na tha aur nishanat na the

dil khizar ban ke chala hai to wahan tak pahunche

khak hi khak nazar aya hamen apna wajud

bhes badle hue go bazm-e-jahan tak pahunche

teri ejaz bayani ke ye charche ejaz

ab to har bazm mein har ahl-e-zaban tak pahunche