اس کے حریم ناز میں تیرا گزر کہاں

اس کے حریم ناز میں تیرا گزر کہاں

اے دل یہ سچ بتا کہ رہا رات بھر کہاں

منزل سے دور گم شدۂ کارواں ہوں میں

آئیں مری مدد کے لئے ہیں خضر کہاں

عزلت نشین خلوت و مست خیال بن

پھرتا رہے گا خاک بنا در بدر کہاں

مجبور عشق ہوں کہ اٹھاتا ہوں اپنے ہاتھ

گو جانتا ہوں میں کہ دعا میں اثر کہاں

اک داستان شوق مرے دل میں ہے ابھی

باتیں ہوئی ہیں یار سے جی کھول کر کہاں

وہ میرے گھر پہ آئیں نہ آئیں بلا ہی لیں

اعجازؔ میرا ایسا مقدر مگر کہاں