ہر نفس تازہ مصیبت عمر بھر دیکھا کیے

ہر نفس تازہ مصیبت عمر بھر دیکھا کیے

دیکھنے کی شے نہ تھی دنیا مگر دیکھا کیے

جس قیامت سے ڈراتا بھی ہے ڈرتا بھی ہے شیخ

ٹھوکروں میں آپ کی شام و سحر دیکھا کیے

تم تو آسودہ شب وعدہ تھے خواب ناز میں

شب سے لے کر صبح تک ہم سوئے در دیکھا کیے

برہمی ان کی عدو کے ظلم گردوں کے ستم

یہ تو دیکھو آفتیں ہم کس قدر دیکھا کیے

اللہ اللہ کس قدر تھا ناز ان کی دید پر

گاہے گاہے خود کو بھی ہم اک نظر دیکھا کیے

آپ ہی اک ہر طرف جلوہ نما تھے بے حجاب

آپ کو دیکھا کیے اور عمر بھر دیکھا کیے

ہم کو ہر سجدہ تھا قیصرؔ تاج شاہی سے سوا

سر کی قیمت آستان دوست پر دیکھا کیے

har nafas taza musibat umr bhar dekha kiye

dekhne ki shai na thi duniya magar dekha kiye

jis qayamat se darata bhi hai darta bhi hai shaikh

thokaron mein ap ki sham-o-sahar dekha kiye

tum to asuda shab-e-waada the khwab-e-naz mein

shab se le kar subh tak ham su-e-dar dekha kiye

barhami un ki adu ke zulm gardun ke sitam

ye to dekho afaten ham kis qadar dekha kiye

allah allah kis qadar tha naz un ki did par

gahe gahe khud ko bhi ham ik nazar dekha kiye

ap hi ik har taraf jalwa numa the be hijab

ap ko dekha kiye aur umr bhar dekha kiye

ham ko har sajda tha qaisar taj-e-shahi se siwa

sar ki qimat astan-e-dost par dekha kiye