اتنا بڑا تو ہو مرا دالان کم سے کم

اتنا بڑا تو ہو مرا دالان کم سے کم

دو چار دن تو رک سکیں مہمان کم سے کم

سب سے کہیں گے نسل ہیں ہم میرؔ و فیضؔ کی

گھر میں رکھیں گے ایک دو دیوان کم سے کم

اس واسطے بھی اب کے کیا عشق ساتواں

اک بار تو ہو فتح یہ میدان کم سے کم

پرچم بغاوتوں کا ہے کیوں سب کے ہاتھ میں

کچھ تو بتاؤ وقت کے سلطان کم سے کم

ان حادثوں نے عمر کو آدھا کیا عبیدؔ

سو سال ورنہ جیتا تھا انسان کم سے کم

itna bara to ho mira dalan kam se kam

do char din to ruk saken mehman kam se kam

sab se kahenge nasl hain ham mir-o-faiz ki

ghar mein rakhenge ek do diwan kam se kam

is waste bhi ab ke kiya ishq satwan

ik bar to ho fath ye maidan kam se kam

parcham baghawaton ka hai kyun sab ke hath mein

kuchh to batao waqt ke sultan kam se kam

in hadson ne umr ko adha kiya ubaid

sau sal warna jita tha insan kam se kam