زخم کھلتے ہیں تو اک درد نہاں کھینچتا ہے

زخم کھلتے ہیں تو اک درد نہاں کھینچتا ہے

ایسا لگتا ہے کوئی جسم سے جاں کھینچتا ہے

ہنستے چہروں سے عیاں ہوتے ہیں غم کے منظر

میرے جیسی کوئی تصویر کہاں کھینچتا ہے

جینا چاہوں بھی تو جینے نہیں دیتی دنیا

مرنا چاہوں تو مجھے سارا جہاں کھینچتا ہے

جھوٹ کہتا ہوں تو کرتا ہے پذیرائی مری

سچ بتاتا ہوں تو وہ شخص زباں کھینچتا ہے

پہلے میں کھینچتا رہتا تھا دھواں سگریٹ کا

اور اب مجھ کو یہ سگریٹ کا دھواں کھینچتا ہے

اس طرح چلتا چلا جاتا ہوں اس کی جانب

جیسے پیاسے کسی انساں کو کنواں کھینچتا ہے

zakhm khulte hain to ik dard-e-nihan khinchta hai

aisa lagta hai koi jism se jan khinchta hai

hanste chehron se ayan hote hain gham ke manzar

mere jaisi koi taswir kahan khinchta hai

jina chahun bhi to jine nahin deti duniya

marna chahun to mujhe sara jahan khinchta hai

jhut kahta hun to karta hai pazirai miri

sach batata hun to wo shakhs zaban khinchta hai

pahle main khinchta rahta tha dhuan sigret ka

aur ab mujh ko ye sigret ka dhuan khinchta hai

is tarah chalta chala jata hun us ki janib

jaise pyase kisi insan ko kuan khinchta hai