موت کی سمت جان چلتی رہی

موت کی سمت جان چلتی رہی

زندگی کی دکان چلتی رہی

سارے کردار سو گئے تھک کر

بس تری داستان چلتی رہی

میں لرزتا رہا ہدف بن کر

مشق تیر و کمان چلتی رہی

الٹی سیدھی چراغ سنتے رہے

اور ہوا کی زبان چلتی رہی

دو ہی موسم تھے دھوپ یا بارش

چھتریوں کی دکان چلتی رہی

جسم لمبے تھے چادریں چھوٹی

رات بھر کھینچ تان چلتی رہی

پر نکلتے رہے بکھرتے رہے

اونچی نیچی اڑان چلتی رہی

maut ki samt jan chalti rahi

zindagi ki dukan chalti rahi

sare kirdar so gae thak kar

bas tiri dastan chalti rahi

main larazta raha hadaf ban kar

mashq tir-o-kaman chalti rahi

ulti sidhi charagh sunte rahe

aur hawa ki zaban chalti rahi

do hi mausam the dhup ya barish

chhatriyon ki dukan chalti rahi

jism lambe the chadaren chhoti

rat bhar khinch tan chalti rahi

par nikalte rahe bikharte rahe

unchi nichi uran chalti rahi