بہت دشوار ہے رستہ ہمارا

بہت دشوار ہے رستہ ہمارا

نہیں کر پاؤ گے پیچھا ہمارا

رلا دے گا اسے ہنسنا ہمارا

اسے معلوم ہے قصہ ہمارا

تسلی دے رہے ہیں چارہ گر کو

سمجھ لو حال ہے کیسا ہمارا

تمہاری کاپی نے خالی کرایا

کتابوں سے بھرا بستہ ہمارا

بچھڑنے والا مڑ کر دیکھ لیتا

تو ہم کو گھر تو مل جاتا ہمارا

خدا حافظ اگر تم کہہ کے جاتے

تو کچھ دن کام چل جاتا ہمارا

بٹن بس شرٹ میں اک ٹانک دیتے

تو سب غصہ اتر جاتا ہمارا

چلو ساجھے میں بزم دل سجائیں

سجاوٹ آپ کی خرچہ ہمارا