آپ اگر مہرباں نہیں ہوتے

آپ اگر مہرباں نہیں ہوتے

ہم جہاں ہیں وہاں نہیں ہوتے

چاہے جتنے بلند ہوں بادل

یہ کبھی آسماں نہیں ہوتے

جن کے بس میں زبان رہتی ہے

وہ کبھی بے زباں نہیں ہوتے

جو تماشے پسند ہیں مجھ کو

وہ تماشے یہاں نہیں ہوتے

دشت کی بات اور ہے ورنہ

قیس لیلیٰ کہاں نہیں ہوتے

پیڑ پھل دار کٹ گئے جب سے

باغ میں باغباں نہیں ہوتے

دھیان رکھیں پکارنے والے

ہم جہاں ہیں وہاں نہیں ہوتے

ap agar mehrban nahin hote

ham jahan hain wahan nahin hote

chahe jitne buland hun badal

ye kabhi asman nahin hote

jin ke bas mein zaban rahti hai

wo kabhi be zaban nahin hote

jo tamashe pasand hain mujh ko

wo tamashe yahan nahin hote

dasht ki bat aur hai warna

qais laila kahan nahin hote

per phal dar kat gae jab se

bagh mein baghban nahin hote

dhyan rakhen pukarne wale

ham jahan hain wahan nahin hote