Arooz is now on the App Store, for iPhone and iPad. Download →

All poetry

وفا داری غنیمت ہو گئی کیا

Fahmi Badayuni (b. 1952)

وفا داری غنیمت ہو گئی کیا

محبت بھی مروت ہو گئی کیا

عدالت فرش مقتل دھو رہی ہے

اصولوں کی شہادت ہو گئی کیا

ذرا ایمان داری سے بتاؤ

ہمیں تم سے محبت ہو گئی کیا

فرشتوں جیسی صورت کیوں بنا لی

کوئی ہم سے شرارت ہو گئی کیا

کتابت روکنے کا کیا سبب ہے

کہانی کی اشاعت ہو گئی کیا

مزار پیر سے آواز آئی

فقیری بادشاہت ہو گئی کیا

گھٹائیں پوچھنے کو آ رہی ہیں

ہماری چھت کی حالت ہو گئی کیا

یہ کیسا جشن ہے اس کی گلی میں

کوئی بندش اجازت ہو گئی کیا