اک اک کر کے ہو گئے رخصت اب کوئی ارمان نہیں

اک اک کر کے ہو گئے رخصت اب کوئی ارمان نہیں

دل میں گہرا سناٹا ہے اب کوئی مہمان نہیں

تم نے بھی سن رکھا ہوگا ہم بھی سنتے آئے ہیں

جس کے دل میں درد نہ ہو وہ پتھر ہے انسان نہیں

درد کڑا ہو تو بھی اکثر پتھر بن جاتے ہیں لوگ

مرنے کی امید نہیں ہے جینے کا سامان نہیں

کچھ مت بولو چپ ہو جاؤ باتوں میں کیا رکھا ہے

کیوں کرتے ہو ایسی باتیں جن باتوں میں جان نہیں

اوروں جیسی باتیں مجھ کو بھی کرنی پڑتی ہیں روز

یہ تو میری مجبوری ہے یہ میری پہچان نہیں

میری باتیں سیدھی سچی ان میں کوئی پیچ نہیں

ان کو میرؔ کی غزلیں جانو غالبؔ کا دیوان نہیں

دل کو بہلانے کی خاطر ہم بھی کیا کیا کرتے ہیں

خوب سمجھتا ہے وہ بھی سب ایسا بھی نادان نہیں

رات گئے اکثر یوں ہی کیوں پھوٹ پھوٹ کر روتے ہو

خاک تلے سونے والوں سے ملنے کا امکان نہیں

وہ تھا میرے دکھ کا ساتھی اور تمہیں کیا بتلائیں

اس کا میرا جو رشتہ تھا اس رشتے کا نام نہیں

وہ ہوتا تو پھر بھی شاید درد پہ کچھ قابو رہتا

تنہائی سے تنہا لڑنا کچھ ایسا آسان نہیں

ik ik kar ke ho gae rukhsat ab koi arman nahin

dil mein gahra sannata hai ab koi mehman nahin

tum ne bhi sun rakha hoga ham bhi sunte ae hain

jis ke dil mein dard na ho wo patthar hai insan nahin

dard kara ho tu bhi aksar patthar ban jate hain log

marne ki ummid nahin hai jine ka saman nahin

kuchh mat bolo chup ho jao baton mein kya rakha hai

kyun karte ho aisi baten jin baton mein jan nahin

auron jaisi baten mujh ko bhi karni parti hain roz

ye to meri majburi hai ye meri pahchan nahin

meri baten sidhi sachchi un mein koi pech nahin

un ko mir ki ghazlen jano ghalib ka diwan nahin

dil ko bahlane ki khatir ham bhi kya kya karte hain

khub samajhta hai wo bhi sab aisa bhi nadan nahin

rat gae aksar yun hi kyun phut phut kar rote ho

khak tale sone walon se milne ka imkan nahin

wo tha mere dukh ka sathi aur tumhen kya batlaen

us ka mera jo rishta tha is rishte ka nam nahin

wo hota to phir bhi shayad dard pe kuchh qabu rahta

tanhai se tanha larna kuchh aisa asan nahin