کیفیت دل حزیں ہم سے نہیں بیاں ہوئی

کیفیت دل حزیں ہم سے نہیں بیاں ہوئی

لفظ نہ ساتھ دے سکے آنسوؤں سے عیاں ہوئی

شورش واردات قلب شعروں میں ڈھال ڈھال کر

لکھتے رہے تمام عمر ختم نہ داستاں ہوئی

اب نہ وہ دل میں دھڑکنیں اب نہ وہ سوز و ساز ہے

پوچھتے ہیں وفات دل کیسے ہوئی کہاں ہوئی

میری ذرا سی بات پر جانے وہ کیوں خفا ہوئی

کوئی نہ تلخ گفتگو دونوں کے درمیاں ہوئی

گھر تو ہزاروں بن گئے اینٹوں کو جوڑ جوڑ کر

گھر کے مکینوں کی وفا زینت آشیاں ہوئی

صورت تھی وہ کہ برق سی بدلیوں کی تھی اوٹ میں

پردوں سے جھانک جھانک کر پردوں میں ہی نہاں ہوئی

ایک ہی شاخ پر رہے باڑھ میں سانپ اور آدمی

کیسی عجیب دوستی دونوں کے درمیاں ہوئی

kaifiyat-e-dil-e-hazin ham se nahin bayan hui

lafz na sath de sake ansuon se ayan hui

shorish-e-wardat-e-qalb sheron mein dhal dhal kar

likhte rahe tamam umr khatm na dastan hui

ab na wo dil mein dharkanen ab na wo soz-o-saz hai

puchhte hain wafat dil kaise hui kahan hui

meri zara si bat par jane wo kyun khafa hui

koi na talkh guftugu donon ke darmiyan hui

ghar to hazaron ban gae inton ko jor jor kar

ghar ke makinon ki wafa zinat-e-ashiyan hui

surat thi wo ke barq si badliyon ki thi ot mein

pardon se jhank jhank kar pardon mein hi nihan hui

ek hi shakh par rahe barh mein sanp aur admi

kaisi ajib dosti donon ke darmiyan hui