اک ہوک سی جب دل میں اٹھی جذبات ہمارے آ پہنچے

اک ہوک سی جب دل میں اٹھی جذبات ہمارے آ پہنچے

الفاظ جو ذہن میں موزوں تھے ہونٹوں کے کنارے آ پہنچے

حالات غم دل کہہ نہ سکے اور درد دروں بھی سہ نہ سکے

آنسو جو حصار چشم میں تھے پلکوں کے سہارے آ پہنچے

منجھدار میں تھے اور ڈر یہ تھا کہ ڈوب ہی جائیں گے اب ہم

موجوں میں جو لہرائی کشتی تنکوں کے سہارے آ پہنچے

ہم جوش جوانی میں آ کر اک لا محدود سفر میں تھے

معلوم ہوا منزل یہ نہ تھی جب گھاٹ کنارے آ پہنچے

اک عمر گزاری تھی ہم نے مظلوموں کی ہی حمایت میں

جب گوشہ نشینی کی ٹھانی پھر ظلم کے مارے آ پہنچے

بچپن میں بہت دکھ ہوتا تھا مظلوم کی آہ و زاری پر

ہوتے ہی جواں بہلانے کو دنیا کے نظارے آ پہنچے

دنیا کے حوادث نے اتنا پامال کیا ہم کو جوہرؔ

بچنے کی کوئی امید نہ تھی قسمت کے ستارے آ پہنچے

ik huk si jab dil mein uthi jazbat hamare a pahunche

alfaz jo zehn mein mauzun the honton ke kinare a pahunche

halat gham dil kah na sake aur dard-e-darun bhi sah na sake

ansu jo hisar-e-chashm mein the palkon ke sahare a pahunche

manjhdar mein the aur dar ye tha ke dub hi jaenge ab ham

maujon mein jo lahrai kashti tinkon ke sahare a pahunche

ham josh jawani mein a kar ik la mahdud safar mein the

maalum hua manzil ye na thi jab ghat kinare a pahunche

ik umr guzari thi ham ne mazlumon ki hi himayat mein

jab gosha nashini ki thani phir zulm ke mare a pahunche

bachpan mein bahut dukh hota tha mazlum ki ah-o-zari par

hote hi jawan bahlane ko duniya ke nazzare a pahunche

duniya ke hawadis ne itna pamal kiya ham ko jauhar

bachne ki koi umid na thi qismat ke sitare a pahunche