احساسات کی بستی میں جب ہر جانب اک سناٹا تھا

احساسات کی بستی میں جب ہر جانب اک سناٹا تھا

میں آوازوں کے جنگل میں تب جانے کیا ڈھونڈ رہا تھا

جن راہوں سے اپنے دل کا ہر قصہ منسوب رہا ہے

اب تو یہ بھی یاد نہیں ہے ان راہوں کا قصہ کیا تھا

آج اسی کے افسانوں کا محفل محفل چرچا ہوگا

کل چوراہے پر تنہا جو شخص بہت خاموش کھڑا تھا

یوں جیون رس کب دیتا ہے پھر سے اپنے زخم کریدو

تم نے آخر کیا سوچا تھا درد سے کیوں سنیاس لیا تھا

ایسی کوئی بات نہیں تھی ان راہوں سے لوٹ بھی آتے

لیکن ان راہوں پہ کسی نے کچھ دن اپنا ساتھ دیا تھا

اس نگری میں لگ بھگ سب نے ایک طرح سے چوٹیں کھائیں

لیکن زخموں کو سہلانے کا سب کا اندازہ جدا تھا

تم ان بیگانی راہوں میں آخر کس کو ڈھونڈ رہے ہو

وہ تو کب کا لوٹ چکا ہے کل جو تمہارے ساتھ چلا تھا

ehsasat ki basti mein jab har janib ik sannata tha

main awazon ke jangal mein tab jane kya dhund raha tha

jin rahon se apne dil ka har qissa mansub raha hai

ab to ye bhi yad nahin hai in rahon ka qissa kya tha

aj usi ke afsanon ka mahfil mahfil charcha hoga

kal chaurahe par tanha jo shakhs bahut khamosh khara tha

yun jiwan ras kab deta hai phir se apne zakhm kuredo

tum ne akhir kya socha tha dard se kyun sanyas liya tha

aisi koi bat nahin thi in rahon se laut bhi ate

lekin in rahon pe kisi ne kuchh din apna sath diya tha

is nagri mein lag bhag sab ne ek tarah se choten khaen

lekin zakhmon ko sehlane ka sab ka andaza juda tha

tum un begani rahon mein akhir kis ko dhund rahe ho

wo to kab ka laut chuka hai kal jo tumhare sath chala tha