ابھی تک تلخیٔ مے میں کمی معلوم ہوتی ہے

ابھی تک تلخیٔ مے میں کمی معلوم ہوتی ہے

لبوں پر اک بلا کی تشنگی معلوم ہوتی ہے

تصور میں تمہاری مسکراہٹ رچ گئی شاید

مجھے ہر شے مسرت سے بھری معلوم ہوتی ہے

سنا ہے زندگی میں کشمکش سے لوگ ڈرتے ہیں

مجھے تو کشمکش ہی زندگی معلوم ہوتی ہے

مری معصومیت تو دیکھ لو فرط محبت میں

تمہاری بے رخی بھی دل لگی معلوم ہوتی ہے

خلوص دل سے کیا جذبہ نمایاں کر دیا تم نے

کہ ہر صورت مجھے کچھ اجنبی معلوم ہوتی ہے

کسی کی دوستی میں دشمنی کی بو تو کیا آئے

مجھے تو دشمنی بھی دوستی معلوم ہوتی ہے

abhi tak talkhi-e-mai mein kami maalum hoti hai

labon par ik bala ki tishnagi maalum hoti hai

tasawwur mein tumhari muskurahat rach gai shayad

mujhe har shai masarrat se bhari maalum hoti hai

suna hai zindagi mein kashmakash se log darte hain

mujhe to kashmakash hi zindagi maalum hoti hai

miri maasumiyat to dekh lo fart-e-mohabbat mein

tumhari be rukhi bhi dil lagi maalum hoti hai

khulus-e-dil se kya jazba numayan kar diya tum ne

ke har surat mujhe kuchh ajnabi maalum hoti hai

kisi ki dosti mein dushmani ki bu to kya ae

mujhe to dushmani bhi dosti maalum hoti hai