کسی بھی خواب میں جب دل کشی باقی نہیں رہتی

کسی بھی خواب میں جب دل کشی باقی نہیں رہتی

تو پھر جذبات میں وہ بات ہی باقی نہیں رہتی

گزر تو ہو ہی جاتی ہے سنبھل کر چلنے والوں کی

مگر پھر زندگی میں زندگی باقی نہیں رہتی

تمہیں اچھی نہیں لگتیں مری بے باکیاں لیکن

تکلف میں بھی اکثر دوستی باقی نہیں رہتی

جوانی میں بھلا کیسے کریں ہم ہوش کی باتیں

کہ ایسی بے خودی میں آگہی باقی نہیں رہتی

ہٹاؤ ساغر و مینا نہیں مے کی طلب مجھ کو

حسیں آنکھوں سے پی کر تشنگی باقی نہیں رہتی