جو زندگی کے سب سے حسیں موڑ پر ملا

جو زندگی کے سب سے حسیں موڑ پر ملا

وہ شخص پھر نہ مجھ کو کبھی عمر بھر ملا

غم کی ہر اک کتاب میں تھا درج میرا نام

رکھا ہوا میں ہر در و دیوار پر ملا

تلوار کی طرح تھی ہوا تیز راہ میں

پتا بچا نہ ایک بھی ثابت شجر ملا

لاکھوں کا قتل کر کے بھی وہ مطمئن نہ تھا

آخر وہ اپنے خوں میں مجھے تر بہ تر ملا

تو حال زندگی کا مری جان جائے گا

بس ایک بار میری نظر سے نظر ملا

ہر ایک پھول پر تھی ترے آنسوؤں کی اوس

قطرہ مرے لہو کا ہر اک شاخ پر ملا

jo zindagi ke sab se hasin mor par mila

wo shakhs phir na mujh ko kabhi umr bhar mila

gham ki har ik kitab mein tha darj mera nam

rakha hawa mein har dar-o-diwar par mila

talwar ki tarah thi hua tez rah mein

patta bacha na ek bhi sabit shajar mila

lakhon ka qatl kar ke bhi wo mutmain na tha

akhir wo apne khun mein mujhe tar ba tar mila

tu hal zindagi ka miri jan jaega

bas ek bar meri nazar se nazar mila

har ek phul par thi tire ansuon ki os

qatra mire lahu ka har ik shakh par mila