عطا کر دی کسی نے وہ بلا کی تشنگی مجھ کو

عطا کر دی کسی نے وہ بلا کی تشنگی مجھ کو

نہ راس آئے گی شاید زندگی بھر زندگی مجھ کو

مری یہ بے بسی تو خیر کچھ ایسی نہیں ہمدم

مگر جینے نہیں دے گی تری بے چارگی مجھ کو

بھلا میں رتبۂ دیوانگی کا مستحق کب تھا

کسی کے پیار نے دے دی یوںہی دیوانگی مجھ کو

کوئی منزل بھی ہو وہ میری منزل ہو نہیں سکتی

ازل سے ہی ملی ہے بے سبب آوارگی مجھ کو

مجھے تو زندگی میں بارہا محسوس ہوتا ہے

مرے معصوم خوابوں نے ہی دی ہے نغمگی مجھ کو