محبت سے جنوں کی داستاں تک آ گیا ہوں میں

محبت سے جنوں کی داستاں تک آ گیا ہوں میں

کسی کے عشق میں دیکھو کہاں تک آ گیا ہوں میں

یہ راہیں خود بخود کیسے منور ہو اٹھیں یارب

گماں ہوتا ہے منزل کے نشاں تک آ گیا ہوں میں

کسے معلوم تھا جذبات یہ بھی رنگ لائیں گے

جنوں میں اب کسی کے امتحاں تک آ گیا ہوں میں

کبھی اک درد بن کر صرف ان کے دل میں پنہاں تھا

مگر اب گیت بن کر ہر زباں تک آ گیا ہوں میں

نہیں وہ بات ہی کچھ اور تھی جس کی تمنا تھی

یوں ہی جذبات کی رو میں یہاں تک آ گیا ہوں میں

تمہاری ان حسیں مخمور آنکھوں کی قسم ہمدم

وہیں تک راہ الفت ہے جہاں تک آ گیا ہوں میں

کہیں منزل سے آگے ہی نہ آ پہنچا ہوں میں یارو

ذرا آواز دو مجھ کو کہاں تک آ گیا ہوں میں

تمنا ہے افق کے دھندلے پردے چاک کر ڈالوں

کسی کی جستجو میں اب یہاں تک آ گیا ہوں میں

mohabbat se junun ki dastan tak a gaya hun main

kisi ke ishq mein dekho kahan tak a gaya hun main

ye rahen khud bakhud kaise munawwar ho uthen yarab

guman hota hai manzil ke nishan tak a gaya hun main

kise maalum tha jazbat ye bhi rang laenge

junun mein ab kisi ke imtihan tak a gaya hun main

kabhi ik dard ban kar sirf un ke dil mein pinhan tha

magar ab git ban kar har zaban tak a gaya hun main

nahin wo bat hi kuchh aur thi jis ki tamanna thi

yun hi jazbat ki rau mein yahan tak a gaya hun main

tumhari un hasin makhmur ankhon ki qasam hamdam

wahin tak rah ulfat hai jahan tak a gaya hun main

kahin manzil se age hi na a pahuncha hun main yaro

zara awaz do mujh ko kahan tak a gaya hun main

tamanna hai ufuq ke dhundle parde chak kar dalun

kisi ki justuju mein ab yahan tak a gaya hun main