زندگی اک جال میں الجھی ہوئی ہے آج بھی — Balbir Rathi

Arooz is now on the App Store, for iPhone and iPad. Download →

زندگی اک جال میں الجھی ہوئی ہے آج بھی

بے بسی پہلے جو تھی وہ بے بسی ہے آج بھی

آج بھی سہمی ہوئی ہے ہر طرف انسانیت

آدمی کی کوششوں میں کچھ کمی ہے آج بھی

اے دل معصوم تیری آرزؤں کے طفیل

بے سبب بے مدعا دیوانگی ہے آج بھی

میری منزل کے نشاں تک مٹ چکے مدت ہوئی

کس لیے اے دل وہی آوارگی ہے آج بھی

ایک مدت ہو گئی وہ حادثہ گزرے ہوئے

حوصلوں پر کس لیے بے چارگی ہے آج بھی

زندگی کیوں خشک ہے بے کیف ہے بے رنگ ہے

کچھ نہ کچھ تو بات ہے جس کی کمی ہے آج بھی