ایک نہ اک دیوار سرکتی رہتی ہے

ایک نہ اک دیوار سرکتی رہتی ہے

گھر کی چھت ہر رت میں ٹپکتی رہتی ہے

جسم مرا شہروں میں ہنستا گاتا ہے

روح مری جنگل میں سسکتی رہتی ہے

تتلی پیار کرے کاغذ کے پھولوں سے

خوشبو صحراؤں میں بھٹکتی رہتی ہے

بھیڑ میں بھی اک چاند چمکتا رہتا ہے

شہر میں بھی پائل سی چھنکتی رہتی ہے

چاروں اور کے خالی منظر میں ہر سانس

آنکھ مری تری صورت تکتی رہتی ہے

جنگ لڑے برسوں گزرے لیکن اب بھی

سر پہ مرے تلوار چمکتی رہتی ہے

برف تو دور پہاڑوں پر گرتی ہے اشکؔ

آگ مری وادی میں دہکتی رہتی ہے

ek na ik diwar sarakti rahti hai

ghar ki chhat har rut mein tapakti rahti hai

jism mira shahron mein hansta gata hai

ruh miri jangal mein sisakti rahti hai

titli pyar kare kaghaz ke phulon se

khushbu sahraon mein bhatakti rahti hai

bhir mein bhi ik chand chamakta rahta hai

shahr mein bhi pail si chhankti rahti hai

charon aur ke khali manzar mein har sans

ankh miri tiri surat takti rahti hai

jang lare barson guzre lekin ab bhi

sar pe mire talwar chamakti rahti hai

barf to dur paharon par girti hai ashk

ag miri wadi mein dahakti rahti hai