ویران سا اب ہوں جو میں ایسا تو نہیں تھا

ویران سا اب ہوں جو میں ایسا تو نہیں تھا

ہوتا تھا سمندر کبھی صحرا تو نہیں تھا

چہرے پہ رقم تھا جو وہ پڑھ ہی نہیں پایا

سب جانتا تھا اتنا بھی سادہ تو نہیں تھا

آنگن میں مرے دل کے چلی آئی تھی کل شام

تھی یاد تمہاری کوئی جھونکا تو نہیں تھا

چپ چاپ تصور میں چلے آتے کسی روز

سوچوں پہ میری جاں کوئی پہرہ تو نہیں تھا

ہم درد کا افسانہ سناتے اسے کیوں کر

ظاہر میں جو اپنا تھا پر اپنا تو نہیں تھا

سب چل دئے موجوں کے حوالے اسے کر کے

مانا کہ بھنور میں تھا وہ ڈوبا تو نہیں تھا

وہ جس کو تھا سینے کا ہر اک زخم دکھایا

باتوں پہ مری اس کو بھروسہ تو نہیں تھا

کر کے مجھے برباد گیا ہے وہ ستم گر

گلشن یوں ہی دل کا مرے اجڑا تو نہیں تھا

کیوں روتا ہے اب ہجر میں تیرے وہ مسرتؔ

جاتے ہوئے اس نے تجھے روکا تو نہیں تھا

wiran sa ab hun jo main aisa to nahin tha

hota tha samundar kabhi sahra to nahin tha

chehre pe raqam tha jo wo parh hi nahin paya

sab janta tha itna bhi sada to nahin tha

angan mein mire dil ke chali ai thi kal sham

thi yad tumhari koi jhonka to nahin tha

chup chap tasawwur mein chale ate kisi roz

sochon pe meri jan koi pahra to nahin tha

ham dard ka afsana sunate use kyun kar

zahir mein jo apna tha par apna to nahin tha

sab chal diye maujon ke hawale use kar ke

mana ke bhanwar mein tha wo duba to nahin tha

wo jis ko tha sine ka har ik zakhm dikhaya

baton pe miri us ko bharosa to nahin tha

kar ke mujhe barbad gaya hai wo sitam gar

gulshan yun hi dil ka mire ujra to nahin tha

kyun rota hai ab hijr mein tere wo masarrat

jate hue us ne tujhe roka to nahin tha