پہلے اطلس میں جو ملبوس کیے جاتے ہیں

پہلے اطلس میں جو ملبوس کیے جاتے ہیں

پھر وہ ایوانوں میں محبوس کیے جاتے ہیں

میں انہیں حیطۂ تحریر میں لاؤں کیسے

درد لکھے نہیں محسوس کیے جاتے ہیں

بال و پر کاٹ کے دیں اذن رہائی کیوں کر

ان پرندوں کو جو مانوس کیے جاتے ہیں

اتنی آسان نہیں ہوتی ہے یہ راہ سخن

پار اس میں کئی قاموس کیے جاتے ہیں

ان پہ تو آپ ہی جھک جاتی ہے رب کی رحمت

جو بھی اس دنیا سے مایوس کیے جاتے ہیں

کیوں نہ ہوں زیر و زبر تخت مسرتؔ ان کے

رقص جب سایۂ طاؤس کیے جاتے ہیں

pahle atlas mein jo malbus kiye jate hain

phir wo aiwanon mein mahbus kiye jate hain

main unhen hita-e-tahrir mein laun kaise

dard likhe nahin mahsus kiye jate hain

bal-o-par kat ke den izn-e-rihai kyun kar

in parindon ko jo manus kiye jate hain

itni asan nahin hoti hai ye rah-e-sukhan

par is mein kai qamus kiye jate hain

un pe to ap hi jhuk jati hai rab ki rahmat

jo bhi is duniya se mayus kiye jate hain

kyun na hun zer-o-zabar takht masarrat un ke

raqs jab saya-e-taus kiye jate hain