گزری تھی ایک بار جو دل کی گلی سے میں

گزری تھی ایک بار جو دل کی گلی سے میں

دو چار آج بھی ہوں اسی بے کلی سے میں

بیزار اس قدر ہوں غم عاشقی سے میں

مجھ سے ذرا خفا ہے خوشی اور خوشی سے میں

نکلی ہوں جب سے ڈھونڈنے بے لوث چاہتیں

دھوکا ہی کھا رہی ہوں بڑی سادگی سے میں

معدوم اس کی آنکھ سے پہچان ہو گئی

جیسے کہ مل رہی تھی کسی اجنبی سے میں

جنس وفا جہان میں نایاب کیوں ہوئی

رو رو کے پوچھتی رہی ہر آدمی سے میں

اپنی خوشی سے ویسے بسر تو نہ کر سکی

ناراض بھی نہیں ہوں مگر زندگی سے میں

میں نے بھی صاف لفظوں میں غم سے یہ کہہ دیا

پیچھا چھڑا کے آئی ہوں افسردگی سے میں

مے خانہ چل کے رند کا خود پوچھتا ہے حال

مانوس اس طرح سے ہوں اب مے کشی سے میں

جام و سبو نہیں تری آنکھوں سے اب پلا

اے ساقی مر نہ جاؤں کہیں تشنگی سے میں

guzri thi ek bar jo dil ki gali se main

do char aj bhi hun usi be kali se main

bezar is qadar hun gham-e-ashiqi se main

mujh se zara khafa hai khushi aur khushi se main

nikli hun jab se dhundne be los chahaten

dhoka hi kha rahi hun bari sadgi se main

maadum us ki ankh se pahchan ho gai

jaise ke mil rahi thi kisi ajnabi se main

jins-e-wafa jahan mein nayab kyun hui

ro ro ke puchhti rahi har admi se main

apni khushi se waise basar to na kar saki

naraz bhi nahin hun magar zindagi se main

main ne bhi saf lafzon mein gham se ye kah diya

pichha chhura ke ai hun afsurdagi se main

mai khana chal ke rind ka khud puchhta hai hal

manus is tarah se hun ab mai kashi se main

jam-o-subu nahin tiri ankhon se ab pila

ai saqi mar na jaun kahin tishnagi se main