ذات جب بھی اڑان تک پہنچی

ذات جب بھی اڑان تک پہنچی

وسعت لا مکان تک پہنچی

جب حقیقت گمان تک پہنچی

اک نئے امتحان تک پہنچی

بات پھیلائی تھی جو دشمن نے

دیکھو وہ مہربان تک پہنچی

کشتیاں سب جلا کے آئی تھی

جب وہ تیرے مکان تک پہنچی

اک ترا نام کیا لیا ہم نے

بات تیر و کمان تک پہنچی

رازداں سے کہی تھی چپکے سے

بات سارے جہان تک پہنچی

اب ترے انتظار میں اے دوست

مسکراہٹ تھکان تک پہنچی

اوڑھ کر ضبط کی ردا پیہم

حوصلے کی چٹان تک پہنچی

آخر شب دعا مسرتؔ کی

جا کے پھر آسمان تک پہنچی

zat jab bhi uran tak pahunchi

wusat-e-la makan tak pahunchi

jab haqiqat guman tak pahunchi

ik nae imtihan tak pahunchi

bat phailai thi jo dushman ne

dekho wo mehrban tak pahunchi

kashtiyan sab jala ke ai thi

jab wo tere makan tak pahunchi

ik tira nam kya liya ham ne

bat tir-o-kaman tak pahunchi

razdan se kahi thi chupke se

bat sare jahan tak pahunchi

ab tire intizar mein ai dost

muskurahat thakan tak pahunchi

orh kar zabt ki rida paiham

hausle ki chatan tak pahunchi

akhir-e-shab dua masarrat ki

ja ke phir asman tak pahunchi