ہے تلخ تر حیات اس شراب سے

ہے تلخ تر حیات اس شراب سے

تو عشق ہار دے گا اجتناب سے

کہانیاں دہک رہی ہیں رات کی

بدن الجھ رہے ہیں ماہتاب سے

خدائے خواب خیمہ زن تھا آنکھ میں

سو دل چٹخ رہا تھا اضطراب سے

میں روشنی کے بیج بو کے سو گیا

چراغ اگ رہے ہیں کشت خواب سے

رفو گرو ہم ایسے خستہ تن یہاں

ادھڑ ادھڑ کے آئیں گے سراب سے

رضاؔ یہ خوشبوؤں کا ذائقہ نہیں

جو رس رہا ہے جسم کے گلاب سے

hai talkh tar-e-hayat is sharab se

tu ishq har dega ijtinab se

kahaniyan dahak rahi hain rat ki

badan ulajh rahe hain mahtab se

khuda-e-khwab khema zan tha ankh mein

so dil chatakh raha tha iztirab se

main raushni ke bij bu ke so gaya

charagh ug rahe hain kisht-e-khwab se

rafu giro ham aise khasta tan yahan

udhar udhar ke aenge sarab se

raza ye khushbuon ka zaiqa nahin

jo ras raha hai jism ke gulab se