ایسا نہیں تھا اصل میں جیسا بنا لیا

ایسا نہیں تھا اصل میں جیسا بنا لیا

دل نے کسی کی یاد کا چہرہ بنا لیا

پہلی نشست آبلہ پاؤں میں میری ہے

مجنوں کو میں نے دشت میں چیلا بنا لیا

کھینچی ہے اپنے خون سے نقشے پہ اک لکیر

جنگل میں اپنی مرضی کا رستہ بنا لیا

میرے لیے تو ان میں کوئی فرق ہے نہیں

جب چاہا اپنی بیٹی کو بیٹا بنا لیا

محروم یوں ہوئی ہوں میں اس در کے سامنے

مکڑی نے میرے ہونٹوں پہ جالا بنا لیا

ان میں کشش عجیب تھی دریا دلی کے ساتھ

لوگوں نے دشت زادوں کو آقا بنا لیا

چمکا تھا ایک جگنو مرے دل کے آس پاس

اب جس کو سب نے آنکھ کا تارہ بنا لیا

گھر میں جگہ ہے اس کی نہ ہے گھاٹ میں جگہ

قسمت کو ہم نے دھوبی کا کتا بنا لیا

ہم نے وہاں فروخت کی تھی وحشتیں صباؔ

دنیا نے جس دکان میں کھاتا بنا لیا

aisa nahin tha asl mein jaisa bana liya

dil ne kisi ki yad ka chehra bana liya

pahli nashist abla paon mein meri hai

majnun ko main ne dasht mein chaila bana liya

khinchi hai apne khun se naqshe pe ik lakir

jangal main apni marzi ka rasta bana liya

mere liye to un mein koi farq hai nahin

jab chaha apni beti ko beta bana liya

mahrum yun hui hun main us dar ke samne

makri ne mere honton pe jala bana liya

un mein kashish ajib thi dariya dili ke sath

logon ne dasht zadon ko aqa bana liya

chamka tha ek jugnu mire dil ke as pas

ab jis ko sab ne ankh ka tara bana liya

ghar mein jagah hai us ki na hai ghat mein jagah

qismat ko ham ne dhobi ka kutta bana liya

ham ne wahan farokht ki thi wahshaten saba

duniya ne jis dukan mein khata bana liya